१७ चैत, बागलुङ।
नेपालको एकमात्र सिकार आरक्ष ढोरपाटनमा यस वर्षको दोस्रो सिकार याम सुरू भएको छ । दोस्रो याममा १३ नाउर, १० झारल र १२ वटा बँदेलसहित ३५ वटा वन्यजन्तुको सिकार हुने छ ।
राष्ट्रिय निकुञ्ज तथा वन्यजन्तु संरक्षण विभागले गत १५ माघमा सिकारका लागि बोलपत्र आह्वान गरेको थियो ।दोस्रो याममा सिकार खेल्न हिमालयन वाइल्डलाइफ आउटफिर्टस प्रालि, ट्रयाक्स एण्ड ट्रेल्स प्रालि, हिमालयन सफारिज प्रालि, ग्लोबल सफारिज नेपाल, नेपाल ट्राभल एक्सपिडिसन र ओपन नेपाल वाइल्डलाइफ सफारिज गरी ६ वटा कम्पनीले अनुमति पाएका छन् ।
वन्यजन्तु तथा राष्ट्रिय निकुञ्ज विभागबाट अनुमति पाएका सिकारी ढोरपाटन सिकार आरक्षको विभिन्न ब्लकमा सिकार खेल्न आउन थालेका छन् । यही २६ चैतदेखि सिकारी ढोरपाटन आउन थालेका ढोरपाटन सिकार आरक्ष कार्यालयका रेन्जर सागर सुवेदीले जानकारी दिए । दोस्रो याम (फागुन–वैशाख) का लागि आगामी १६ वैशाखसम्म सिकार गर्ने समयसीमा तोकिएको छ ।
अहिलेसम्म २ वटा नाउरको मात्र सिकार भएको सुवेदीले बताए । उनका अनुसार हिमालयन वाइल्डलाइफ आउटफिर्टसले सिकारीमार्फत २ नाउर र २ बँदेल सिकार गर्न अनुमतिपत्र पाएको छ । यो कम्पनीले एउटा नाउर सिकार गरिसकेको सुवेदीले जानकारी दिए । स्पेनका ७० वर्षीय मार्कोस ओलाइजोला अल्कोर्टाले उक्त नाउरको सिकार सुनदह ब्लकमा गरेका थिए ।
त्यसैगरी, ट्रयाक्स एण्ड ट्रेल्स प्रालिमार्फत अमेरिकी सिकारीले २ वटा नाउर, २ झारल र २ वटा बँदेल सिकार गर्ने अनुमति पाएका छन् । हिमालयन सफारिज प्रालिमार्फत ३ जना सिकारीले ३ वटा नाउर र एक झारलका लागि अनमति पाएका छन् । ग्लोबल सफारिज नेपाल प्रालिमार्फत २ जना सिकारीले २ वटा नाउर, एक झारल र २ वटा बँदेलको सिकार गर्ने अनुमति पाएका छन् । उक्त कम्पनीले हालसम्म एउटा नाउर फागुने ब्लकमा सिकार गरेका आरक्षले जनाएको छ ।
नेपाल ट्राभल एक्सपिडिसन प्रालिमार्फत ३ जना सिकारीले ३ वटा नाउर, ३ झारल र ३ वटा बँदेल सिकार गर्ने अनुमति पाएका छन् । यो कम्पनीबाट आएका सिकारीले हतियारमा समस्या आएपछि सिकार नगरी फर्किएका रेन्जर सुवेदीले बताए । ओपन नेपाल वाइल्डलाइफ सफारी एण्ड ट्रेक्स प्रालिमार्फत ३ जना सिकारीले एक नाउर, २ झारल र ३ वटा बँदेलको सिकार गर्न अनुमति पाएका छन् ।
यो सिकार याममा अमेरिका, अर्जेन्टिना, स्पेन र फ्रान्सबाट सिकारी आएका छन् । सुवेदीका अनुसार एउटा झारलको मूल्य ८ लाख, नाउराको ६ लाख २५ हजार ५ सय रूपैयाँ तोकिएको छ । यसपटक सुनदह, सेङ, भुस्तुङ, दोगाडी, फागुने, बार्से ब्लकमा सिकार भइरहेको ढोरपाटन सिकार आरक्षका प्रमुख संरक्षण अधिकृत चन्द्रशेखर चौधरीले जानकारी दिए ।
दोस्रो याममा एक करोड २६ लाख राजस्व संकलन भएको उनले बताए । सिकारीले मारेको वन्यजन्तु लैजान पनि राजस्व तिर्नुपर्ने प्रावधान छ । ढोरपाटनमा हरेक वर्ष २ याममा सिकार खुला हुन्छ । पहिलो (असोज–मंसिर) र दोस्रो (फागुन–वैशाख) मा सिकार खुला हुन्छ ।
